Ábyrgð á Icesave?

Kæri Íslendingur.
Ég hvet þig til að láta þína skoðun í ljós á http://kjosum.is/ .

Allt ætlaði um koll að keyra á Alþingi þegar Íslensk erfðagreining átti að fá ríkisábyrgð á lánaskuldbindingum.............

Ef forseti vor staðfestir þá ósvinnu sem alþingi hefur samþykkt með svokölluðu "Icesave frumvarpi" ............þá staðfestir hann jafnframt að stjórnendur einkarekinna banka hafi með réttu getað skuldbundið land, þjóð og komandi kynslóðir til þess að taka ábyrgð á rekstri viðkomandi banka án þess að þurfa að spyrja kóng né prest.

Íslendingar lögleiddu reglugerðir evrópusambandsins um Tryggingasjóð innistæðueigenda og fjárfesta (http://www.tryggingarsjodur.is/UmSjodinn/) eins og krafist var af Evrópusambandinu á sínum tíma.
Ekkert í lögum um sjóðinn kveður á um ríkisábyrgð en þar er m.a. að finna eftirfarandi..... Skv. lögum um sjóðinn skal heildareign innstæðudeildar nema a.m.k. 1% af meðaltali tryggðra innstæðna í viðskiptabönkum og sparisjóðum á næstliðnu ári og heildareign verðbréfadeildar nema a.m.k. 100 m.kr.

Ábyrgð sjóðsins ætti ekki að vera meiri en sem nam greiðsluþoli sjóðsins eins og það var við hrun íslenska bankakerfisins og þá í þeirri tímaröð sem bankar fóru á hausinn þar til tryggingafé sjóðsins var uppurið, fyrstir koma fyrstir fá.
Ef að sjóðnum hefði verið ætlað að takast á við afleiðingar bankakerfishruns eins og varð á Íslandi þá hefði sjóðurinn þurft að vera margfalt stærri en regluverk Evrópusambandsins sagði til um.
Um er að ræða handvömm Evrópusambandsins og það er ekki Íslendinga að súpa seiðið af því.

Baráttukveðja,
Snorri Hreggviðsson

Fleiri fiskar í sjónum en verslanir Haga

Kæru Íslendingar.
Þið eruð sjálfstæðir og hafið val.

Hugsið ykkur tvisvar um áður en þið veljið af hverjum þið kaupið vörur eða þjónustu.
Viljið þið fá afslátt í dag og bakreikninginn sendan síðar?

Verslanir og fyrirtæki í eigu Haga eru býsna mörg en listann er auðvelt að leggja á minnið.

Það eru fleiri verslanir í landinu sem vert er að beina viðskiptum sínum til heldur en........
Hagkaup
Bónus
Bananar
Hýsing
Aðföng
Ferskar kjötvörur
Debenhams
Karen Millen
All Saints
Warehouse
TOPSHOP
Zara
Oasis
Dorothy Perkins
Coast
Evans
Útilíf
Jane Norman
DAY

Verjum peningunum okkar á skynsamlegan hátt :-)
Snorri Hreggviðsson

Kjósum fólk og málefni framtíðarinnar!

Kæri kjósandi.

Vandaðu valið og veldu þitt fólk og þín málefni frekar en flokka og fyrirgreiðslupólitík.  Sveitarstjórnarmál eru hagsmunamál nærsamfélagsins og eiga ekki að líða fyrir landsmálapólitík.

Helstu baráttumál mín eru eftirfarandi:

Atvinnu-, ferða- og þróunarmál:

• Farið verði strax í sumar í atvinnuskapandi aðgerðir á vegum Mosfellsbæjar eins og sjá má í nýjustu bloggfærslu minni hér neðar. 
• Stutt verði við Heilsuklasann t.d. með ráðgjöf, aðstöðu og fjárframlögum.
• Aukin verði aðstoð við frumkvöðla í samstarfi við frumkvöðlasetur, bæði einkarekin og opinber.
• Atvinnutengd málefni verði færð frá bæjarráði til þróunar- og ferðamálanefndar.
• Ráðinn verði atvinnumálafulltrúi sem starfi með fyrirtækjum og frumkvöðlum að atvinnutengdri uppbyggingu.
• Mosfellsbær verið sjálfsagður áningarstaður ferðamanna með auknu samstarfi allra ferðaþjónustuaðila. Meiri kynning verði á ferðatengdri starfsemi í Mosfellsbæ, gerð verði tjald- og húsbílastæði ofl. í Ævintýragarði, Álafosskvos snyrt og endurbætt og fjölgað ferðatengdum viðburðum eins og Í túninu heima, 7 tinda hlaupinu, Heilsudögum í Mosfellsbæ ofl.
• Nýsköpunar- og frumkvöðlasamkeppni fari fram í Mosfellsbæ strax í lok september. 

Íþróttir og tómstundir fyrir alla í Mosfellsbæ.

Innan íþrótta- og tómstundafélaga í Mosfellsbæ er unnið frábært og óeigingjarnt starf foreldra, þjálfara, stjórnenda og starfsmanna.

• Áfram ber að bjóða íbúum frístundaávísanir og kanna möguleika á að hækka þær í takt við kostnaðarþróun á hverjum tíma.
• Leggja skal áherslu á samráð við íþrótta- og tómstundafélög um rekstur og uppbyggingu íþrótta- og tómstundastarfs ásamt viðeigandi aðstöðu 
• Tryggja þarf að grundvöllur innra starfs félaganna haldist blómlegt og láta það ganga fyrir dýrum fjárfestingum í mannvirkjum.
• Forgangsraða þarf í samráði við forsvarsmenn íþrótta- og tómstundafélaga ásamt því að virkja félagsmenn þeirra til þátttöku í sjálfboðavinnu við framkvæmdir eins og kostur er.
• Gera þarf raunhæfa kostnaðar- og fjármögnunaráætlun fyrir fyrirhugaðar framkvæmdir á næstu 4 árum og gæta þess að reisa Mosfellingum ekki hurðarás um öxl.
• Dæmi um fyrirliggjandi verkefni (ekki loforðalisti) eru;
  • bygging anddyris, þjónustu- og félagsaðstöðu Aftureldingar að Varmá
  • bygging menningarhúss sem þjónað geti leikfélagi, kórum, tónlistarfólki, kirkju og hvers kyns samkomuhaldi.

    bygging félagsaðstöðu Golfklúbbsins Kjalar
  • endurbætur lýsingar í íþróttasölum fyrir blak, badminton ofl.
  • gerð fimleikagryfju að Varmá
  • endurbætur frjálsíþróttaaðstöðu á Varmárvelli
  • gerð reiðstíga sem auka umferðaröryggi og bæta tengingar við Hafravatn og Hólmsheiði

Umhverfismál.

• Gerum göngu- og hjólreiðar að raunhæfum samgöngukosti í Mosfellsbæ með fjölgun og bættri merkingu stíga.
• Snyrtum nýbyggingasvæði, útrýmum slysagildrum og göngum frá óbyggðum lóðum þannig að sómi sé af.
• Hugum að öflun neysluvatns og varðveislu vatnsverndarsvæða innan Mosfellsbæjar.
• Fylgjum áherslum Staðardagskrár 21 í hvívetna.
• Eyðum lyktarmengun frá Álfsnesi t.d. með athugun á virkjun alls hauggass til raforkuframleiðslu fyrir Mosfellinga.  Það á að vera skilyrði fyrir áframhaldandi starfsemi Sorpu í Álfsnesi.
• Stöðvum ólöglegan akstur vélhjóla á götum og gangstígum í samstarfi við MotoMos með bættir aðstöðu og vitundarvakningu.
• Verndum útivistarsvæði fyrir ágangi vélknúinna farartækja með hindrunum ásamt aukinni fræðslu og forvarnarstarfsemi.

Íbúalýðræði verði virkjað í Mosfellsbæ strax.

• Stofnum hverfasamtök þar sem þau vantar og eflum þau sem fyrir eru
• Sköpum leið til að Mosfellingar geti látið skoðun sína í ljós á íbúagáttinni
• Kjósum um stærri málefni ef 25% íbúa óska þess
• Höldum öflug alvöru íbúaþing einu sinni á ári með þátttöku margra Mosfellinga

Með bestu óskum um ánægjulegt sumar.

Snorri Hreggviðsson

Atvinna er alvörumál – Lausnir strax!

Atvinnulausir í Mosfellsbæ voru skv. skrá Vinnumálastofnunar 416 talsins í mars 2010 og hefur fjölgað um 46% frá ársbyrjun 2009.  Það er gríðarlega mikilvægt að bregðast við þörfum þeirra sem eru eru atvinnulausir þar sem reikna má með að þetta snerti  hátt í 1000 einstaklinga og fjölskyldur þeirra í Mosfellsbæ.  Kostnaður Mosfellsbæjar vegna félagslegrar aðstoðar við atvinnulausa einstaklinga fer vaxandi og nauðsynlegt að bregðast við með uppbyggilegum hætti í stað þess að halda áfram á óbreyttri braut.  Framsóknarmenn hafa mótað skýra stefnu hvað þessi mál áhrærir til að draga úr atvinnuleysi og auka framboð atvinnutækifæra í Mosfellsbæ. 

B-listinn gengur á undan með góðu fordæmi og býður Mosfellingum hér með ókeypis aðstoð og leiðbeiningar í tengslum við frumkvöðlastarfsemi.  Þessi nýsköpunaraðstoð verður boðin síðasta fimmtudag í hverjum mánuði  frá maí og til áramóta í félagsheimili Framsóknarflokksins að Háholti 14, 2.h., sjá nánar á www.mosfellsfrettir.is

Við viljum strax í sumar setja sérstök fjárframlög til atvinnuskapandi aðgerða sem nemur allt að helmingi þess fjármagns sem nú fer beint í félagslega aðstoð.  Þetta fé verði notað til þess að standa straum af beinum atvinnuskapandi úrræðum svo sem:

a.       Ráða strax atvinnu- og ferðamálafulltrúa sem starfi náið með fyrirtækjum og einstaklingum í Mosfellsbæ að atvinnuskapandi aðgerðum.

b.      Kostun aðstöðu undir nýsköpunarstarfsemi t.d. með beinum framlögum til núverandi Frumkvöðlaseturs Mosfellsbæjar.

c.       Nýsköpunar- og frumkvöðlasamkeppni  fari fram í Mosfellsbæ strax í lok ágúst

d.      Stutt verði sérstaklega við Heilsuklasa og heilsutengda ferðaþjónustu í Mosfellsbæ með sérstöku kynningarátaki á starfsemi og þjónustu aðila í Heilsuklasanum.

e.      Ráðist verði strax í sumar í verkefni á vegum Mosfellsbæjar svo sem;

                                                               i.       Gerð og rekstur skógartjaldstæðis í Ullarnesbrekkum

                                                             ii.      Gerð og rekstur hluta fyrirhugaðs Ævintýragarðs

                                                            iii.      Frágang opinna svæða í bænum s.s. við Skólabraut, við Völuteig milli Hraunhúsa og Matfugls og svo milli Borgarplasts og skólagarða, Álafosskvos og víðar.

                                                           iv.      Aðskildir verði allir göngu- og hjólreiðastígar með tilheyrandi merkingum.

                                                             v.      Komið verði upp hreinlætisaðstöðu, bekkjum og ruslatunnum við helstu útivistarstaði svo sem Tröllafoss, Helgufoss, Helgafell, Hafravatn, Úlfarsfell og Mosfell.

                                                           vi.      Lagðir verði göngu- og hjólreiðastígar með tilheyrandi götulýsingu þar sem þá vantar svo sem frá Skólabraut að eldri deild Varmárskóla og einnig úr Leirvogstungu að Varmárskóla,

                                                          vii.      Frjálsíþróttaaðstaða við Varmárvöll verði endurbætt þannig að halda megi reglulega íþróttamót sem dregið geta að fjölda manns og jafnvel Landsmót UMFÍ í framtíðinni.

                                                        viii.      Grasvöllurinn að Varmá verði endurbættur, nýtum þekkingu og reynslu sem fyrirfinnst hjá starfsmanni íþróttamiðstöðvarinnar að Varmá.

                                                           ix.      Stofnað verði atvinnuþróunarfélag Mosfellsbæjar sem verður grunnur að atvinnusköpun í bænum.

 Þetta eykur útgjöld tímabundið en skilar sér í bættum hag bæði fjölskyldna og einstaklinganna sem eiga í hlut.  Þetta mun til lengri tíma litið minnka fjárþörf sem annars skapast í tengslum við félagslega aðstoð Mosfellsbæjar við einstaklinga.  Til að standa undir hluta þessa kostnaðar verði rekstur við yfirstjórn Mosfellsbæjar minnkaður um a.m.k. 30 milljónir á ári en hann hefur vaxið gríðarlega á undanförnum árum.

Horfum björtum augum til atvinnuskapandi aðgerða í Mosfellsbæ.

Snorri Hreggviðsson