Snorri Hreggviðsson

Kæru Íslendingar.
Þið eruð sjálfstæðir og hafið val.

Hugsið ykkur tvisvar um áður en þið veljið af hverjum þið kaupið vörur eða þjónustu.
Viljið þið fá afslátt í dag og bakreikninginn sendan síðar?

Verslanir og fyrirtæki í eigu Haga eru býsna mörg en listann er auðvelt að leggja á minnið.

Það eru fleiri verslanir í landinu sem vert er að beina viðskiptum sínum til heldur en........
Hagkaup
Bónus
Bananar
Hýsing
Aðföng
Ferskar kjötvörur
Debenhams
Karen Millen
All Saints
Warehouse
TOPSHOP
Zara
Oasis
Dorothy Perkins
Coast
Evans
Útilíf
Jane Norman
DAY

Verjum peningunum okkar á skynsamlegan hátt :-)
Snorri Hreggviðsson

Atvinnulausir í Mosfellsbæ voru skv. skrá Vinnumálastofnunar 416 talsins í mars 2010 og hefur fjölgað um 46% frá ársbyrjun 2009.  Það er gríðarlega mikilvægt að bregðast við þörfum þeirra sem eru eru atvinnulausir þar sem reikna má með að þetta snerti  hátt í 1000 einstaklinga og fjölskyldur þeirra í Mosfellsbæ.  Kostnaður Mosfellsbæjar vegna félagslegrar aðstoðar við atvinnulausa einstaklinga fer vaxandi og nauðsynlegt að bregðast við með uppbyggilegum hætti í stað þess að halda áfram á óbreyttri braut.  Framsóknarmenn hafa mótað skýra stefnu hvað þessi mál áhrærir til að draga úr atvinnuleysi og auka framboð atvinnutækifæra í Mosfellsbæ. 

B-listinn gengur á undan með góðu fordæmi og býður Mosfellingum hér með ókeypis aðstoð og leiðbeiningar í tengslum við frumkvöðlastarfsemi.  Þessi nýsköpunaraðstoð verður boðin síðasta fimmtudag í hverjum mánuði  frá maí og til áramóta í félagsheimili Framsóknarflokksins að Háholti 14, 2.h., sjá nánar á www.mosfellsfrettir.is

Við viljum strax í sumar setja sérstök fjárframlög til atvinnuskapandi aðgerða sem nemur allt að helmingi þess fjármagns sem nú fer beint í félagslega aðstoð.  Þetta fé verði notað til þess að standa straum af beinum atvinnuskapandi úrræðum svo sem:

a.       Ráða strax atvinnu- og ferðamálafulltrúa sem starfi náið með fyrirtækjum og einstaklingum í Mosfellsbæ að atvinnuskapandi aðgerðum.

b.      Kostun aðstöðu undir nýsköpunarstarfsemi t.d. með beinum framlögum til núverandi Frumkvöðlaseturs Mosfellsbæjar.

c.       Nýsköpunar- og frumkvöðlasamkeppni  fari fram í Mosfellsbæ strax í lok ágúst

d.      Stutt verði sérstaklega við Heilsuklasa og heilsutengda ferðaþjónustu í Mosfellsbæ með sérstöku kynningarátaki á starfsemi og þjónustu aðila í Heilsuklasanum.

e.      Ráðist verði strax í sumar í verkefni á vegum Mosfellsbæjar svo sem;

                                                               i.       Gerð og rekstur skógartjaldstæðis í Ullarnesbrekkum

                                                             ii.      Gerð og rekstur hluta fyrirhugaðs Ævintýragarðs

                                                            iii.      Frágang opinna svæða í bænum s.s. við Skólabraut, við Völuteig milli Hraunhúsa og Matfugls og svo milli Borgarplasts og skólagarða, Álafosskvos og víðar.

                                                           iv.      Aðskildir verði allir göngu- og hjólreiðastígar með tilheyrandi merkingum.

                                                             v.      Komið verði upp hreinlætisaðstöðu, bekkjum og ruslatunnum við helstu útivistarstaði svo sem Tröllafoss, Helgufoss, Helgafell, Hafravatn, Úlfarsfell og Mosfell.

                                                           vi.      Lagðir verði göngu- og hjólreiðastígar með tilheyrandi götulýsingu þar sem þá vantar svo sem frá Skólabraut að eldri deild Varmárskóla og einnig úr Leirvogstungu að Varmárskóla,

                                                          vii.      Frjálsíþróttaaðstaða við Varmárvöll verði endurbætt þannig að halda megi reglulega íþróttamót sem dregið geta að fjölda manns og jafnvel Landsmót UMFÍ í framtíðinni.

                                                        viii.      Grasvöllurinn að Varmá verði endurbættur, nýtum þekkingu og reynslu sem fyrirfinnst hjá starfsmanni íþróttamiðstöðvarinnar að Varmá.

                                                           ix.      Stofnað verði atvinnuþróunarfélag Mosfellsbæjar sem verður grunnur að atvinnusköpun í bænum.

 Þetta eykur útgjöld tímabundið en skilar sér í bættum hag bæði fjölskyldna og einstaklinganna sem eiga í hlut.  Þetta mun til lengri tíma litið minnka fjárþörf sem annars skapast í tengslum við félagslega aðstoð Mosfellsbæjar við einstaklinga.  Til að standa undir hluta þessa kostnaðar verði rekstur við yfirstjórn Mosfellsbæjar minnkaður um a.m.k. 30 milljónir á ári en hann hefur vaxið gríðarlega á undanförnum árum.

Horfum björtum augum til atvinnuskapandi aðgerða í Mosfellsbæ.

Snorri Hreggviðsson

Grein eftir undirritaðan sem birtist í Mosfellingi 26.feb. síðastliðinn:

________________________________

Heilsutengd ferðaþjónusta er ung og upprennandi atvinnugrein á Íslandi.  Þjónusta við erlenda sjúklinga og aðstandendur þeirra getur verið gríðarlega atvinnu- og verðmætaskapandi og getur gætt samfélag okkar skemmtilegum anda. Dæmi um heilsutengda þjónustu sem hagkvæmt getur verið að bjóða upp á eru til dæmis magahjáveituaðgerðir með tilheyrandi lífsstílstengdri offitumeðferð. 

Á Reykjalundi er rekin sérhæfð deild fyrir offitusjúklinga og væri snjallræði að útvíkka þá starfsemi fyrir bæði innlenda og erlenda skjólstæðinga. Reykjalundur er eins og Mosfellingar vita gríðarlega öflugur vinnustaður og vagga endurhæfingarstarfsemi á Íslandi. Það er þess vegna rökrétt að efla og útvíkka þá starfsemi sem fyrir er á Reykjalundi og stofna hugsanlega til samstarfs við aðila sem ætla sér stóra hluti í þjónustu við erlenda sjúklinga.  Þetta á sér í lagi við endurhæfingu í tengslum við liðskiptiaðgerðir á mjöðmum og hnjám sem til dæmis eru fyrirhugaðar í einkareknu sjúkrahúsi ”Iceland Health” á Ásbrú hjá Kadeco (Þróunarfélagi Keflavíkurflugvallar).  Ýmislegt annað kemur til greina svo sem fyrirhugað stórverkefni ”Primacare” um byggingu sjúkrahúss, hótels og tengdrar þjónustu á bökkum Köldukvíslar.  Þetta verkefni er því miður frekar skammt á veg komið og leitað er fjármagns eins og í mörg önnur uppbyggileg verkefni á Íslandi.  Þegar bæjaryfirvöld leituðu leiða til að styðja ” Primacare” verkefnið þá voru búnir til fjármunir ”á pappírunum” með því að stækka byggingarreit sem Ístak hefur til ráðstöfunar á fyrirhuguðu byggingarsvæði á Tungumelum.  Þarna var því miður farið óvarlega með því að fara innfyrir hverfisverndarmörk við Köldukvísl.  Þetta er ekki í fyrsta skipti sem bæjaryfirvöld leyfa sér að gera þetta á kjörtímabilinu og verðum við að gæta þess að vinna ekki gegn langtímahagsmunum Mosfellsbæjar sem eru m.a. hrein og óspillt náttúra.  ------------

Náttúran er meðal annars það sem gerir Mosfellsbæ að fýsilegum kosti fyrir heilsutengda ferðaþjónustu.  Við þurfum hlúa að henni á öllum sviðum t.d. með viðeigandi umgengni við vatnsverndarsvæði svo takast megi að sjá íbúum fyrir nægilegu köldu og heitu vatni innan bæjarmarkanna.  Stór hluti kalda vatnsins okkar kemur frá Reykjavík og er hyggilegt að Mosfellsbær verði sjálfum sér nógur um vatn í framtíðinni.Staðardagskrá 21 og gildi Mosfellsbæjar; jákvæðni, virðing, framsækni og umhyggja verða að fara saman með heildarhagsmunum en eru ekki einungis eitthvað til að hampa á tyllidögum!Undirritaður hefur hvatt til að einnig verði leitað leiða til að ýta úr vör atvinnuskapandi verkefnum í smærri stíl en að ofan greinir og styður heilshugar stofnun Heilsufélags Mosfellsbæjar.  Jón Pálsson formaður Aftureldingar og Sævar Kristinsson rekstrarráðgjafi hjá Netspor hafa á undanförnum mánuðum unnið ötullega að því að skapa sameiginlega vettvang fyrir heilsutengda starfsemi í Mosfellsbæ.  Þróunar- og ferðamálanefnd hefur ásamt starfsmönnum Mosfellsbæjar samþykkt drög að stofnsamþykkt Heilsufélagsins og er stefnt að því að það komist á laggirnar fljótlega.  Ég hvet alla áhugasama atvinnurekendur og Mosfellinga sem eiga hagsmuna að gæta í ferða- eða heilsutengdri þjónustu að taka þátt í stofnun og mótun Heilsufélagsins. 

Undirritaður hefur bent á það á fundi þróunar- og ferðamálanefndar að ekki sé þénugt að stofna sérstakt félag í hvert skipti sem fýsilegt verkefni rekur á fjörurnar. Ég vil að Mosfellsbær stofni almennt atvinnuþróunarfélag sem hafi það hlutverk að sameina krafta ólíkra hagsmunaaðila, vera þróunar- og nýsköpunarverkefnum hlíf og stökkpallur út í atvinnulífið en ekki eiginlegt rekstarfélag því Bæjarútgerð er úrelt rekstrarform.

------------------------------

Snorri Hreggviðsson

Markmið okkar þurfa að vera skýr og sýnileg, áfangar raunhæfir og mælanlegir. 

Helstu áherslu- og baráttumál mín eru: 

-                     Atvinnumál

Ø      Heilsutengd ferðaþjónusta verði stærsta atvinnugrein í Mosfellsbæ 2014

Ø      Meirihluti garðyrkju í Mosfellsbæ verði vistvæn 2013

Ø      Stofnað verði almennt atvinnuþróunarfélag í Mosfellsbæ 2010

Ø      Fleiri sæki atvinnu til Mosfellsbæjar en úr honum 2014

Ø      Árangursrík íbúaþing haldin ár hvert

Ø      Hverfasamtök virkjuð fyrir árslok 2010

-                     Umhverfis- og samgöngumál

Ø      Staðardagskrá 21 virki bæjarbúa til verka 2011

Ø      Visthæfar samgöngur í Mosfellsbæ verði raunverulegar:

§         Göngu- og hjólreiðastígar meðfram helstu akbrautum 2012

§         Vesturlandsvegur verði yfirbyggður að hluta milli Langatanga og Álafossvegar fyrir 2014

Ø      Ævintýragarður kláraður í áföngum fram til 2014

Sendu mér orðsendingu snorrihre@yahoo.com

Oft var þörf en nú er nauðsyn á að styðja við atvinnustarfsemi í Mosfellsbæ og auka framboð atvinnutækifæra.  Í stað þess að styrkja og efla starf fyrrverandi Atvinnu- og ferðamálanefndar ákvað núverandi bæjarstjórnarmeirihluta að dreifa kröftunum með því að slíta í sundur atvinnumál annars vegar og þróunarmál ásamt nýsköpun hins vegar með stofnun Þróunar- og ferðamálanefndar og færa atvinnumál til Bæjarráðs.  Það dylst engum að ferðamál eru atvinnumál og óeðlilegt að skilja þau frá öðrum atvinnumálum.  Nauðsynlegt er að efla atvinnuþróunarmálin og sameina málaflokkinn aftur undir merkjum einnar nefndar.  

Í Mosfellsbæ er að finna ýmis spennandi tækifæri á sviði atvinnuþróunar og nýsköpunar en því miður hefur núverandi bæjarstjórnarmeirihluta mistekist að stemma stigu við atvinnuleysi og efla atvinnuþróun og nýsköpun. 

Töluverðir fjármunir hafa verið settir í einkarekin nýsköpunarsetur undir merkjum V6 sprotahúss og Frumkvöðlaseturs Mosfellsbæjar.  Frumkvöðlasetur Mosfellsbæjar hefur náð ágætis fótfestu en því miður láðist bæjarstjórnarmeirihlutanum að tryggja það að eðlilega væri staðið að málum við stofnun og rekstur V6.  Ekki var stofnað formlegt félag um reksturinn, rekstraráætlanir ekki gerðar og því miður hætti V6 starfsemi í desember síðastliðnum.  Nauðsynlegt er að fara vel með almannafé og standa að atvinnuþróunarmálum með ábyrgum hætti á tímum atvinnuleysis og fjárskorts. 

Undirritaður situr í Þróunar- og ferðamálanefnd fyrir Framsóknarflokkinn og benti nefndarmönnum í byrjun sumars á mikilvægi þess að styðja við ferðaþjónustu í Mosfellsbæ.  Þetta mætti t.d. gera með bættri miðlun upplýsinga til ferðamanna s.s. með endurútgáfu bæjarkorts í samstarfi við og með yfirliti yfir alla helstu ferðaþjónustuaðila ásamt opnun upplýsingamiðstöðvar ferðamála í Álafosskvosinni.  Á núgildandi korti er ekki að finna merkingar fyrir tjaldstæði eða aðra gistiþjónustu og einnig vantar staðsetningarmerkingar á helstu verslunum og veitingastöðum.  Því miður vita fæstir ferðamenn að helsta upplýsingamiðstöð ferðamála er staðsett í Bókasafni Mosfellsbæjar.  Á fundi nefndarinnar snemma sumars 2009 benti undirritaður á að merkingar vantaði vegna miðlunar upplýsinga til ferðamanna, t.d. mætti setja I-skilti utan á Kjarnann og merkja tjaldstæði á umferðarskilti við hringtorgið við Þingvallaveg vegna tjaldstæða sem er að finna í Mosfellsdal.  Í lok sumars hafði því miður enn ekkert verið gert í þessum málum og eina tjaldstæðið (ómerkt) í bænum að finna á flötinni ið Hlégarð þar sem ekki var hreinlætisaðstaða eða annað sem nauðsynlegt er á slíkum stöðum.

Mikil atvinnuþróunartækifæri er að finna í Mosfellsbæ t.d. á sviði garðyrkju, ferða- og heilbrigðisþjónustu að ógleymdum öflugum þjónustu-, plast- og ullariðnaði. Spennandi verkefni Prima Care um fyrirhugaða byggingu einkasjúkrahúss í Mosfellsbæ er dæmi um það sem vel hefur verið gert á sviði atvinnuþróunarmála en það er sýnd veiði en ekki gefin þar sem fjármögnun á svo risavöxnu verkefni er óviss og stutt á veg komin.

Betur má ef duga skal og þarf að huga að smærri verkefnum sem standa okkur nær í tíma og rúmi. 

Snorri Hreggviðsson